Baith Jaati Hoon, Thak Kar Mein Bhi Kabhi.

Baith jaati hoon, thak kar mein bhi kabhi.
Khwaishon ko pura karte karte,
Umeedo ke dhaage bunate bunate,
Zindagi ko sawaarte sawaarte,
Kabhi girte to kabhi sambhalte,
Tedhe, Medhe rasto par chalte chalte.

Baith jaati hoon, thak kar mein bhi kabhi.
Jimmedariyo ko nibhate nibhate,
Khud ko aage badhaate badhaate,
Kathinaiyon ko paar lagaate lagaate,
Kabhi hanste kabhi rote,
Zindagi ko jeete jeete.

Baith jaati hoon, thak kar mein bhi kabhi.
Khushiyon ko dhundhte dhundhte,
Aansuon ko rokte rokte,
Gamo ko chhupate chhupate,
Kabhi is pal to kabhi us pal,
Palo ko sajate sajate.

Baith jaati hoon, thak kar mein bhi kabhi.
Subah ki roshni ko dekhte dekhte,
Raat ke andhero mein khote khote,
Kabhi pehchan bante, kabhi mitate,
Kuch kar ke dikhate dikhate,
Baith jaati hoon thak kar mein bhi kabhi.